الفترة الأخيرة زادت التوترات والفوضى اوي
بقى كله حاسس بحالة عدم إستقرار (مع إننا قلنا نعم في الإستفتاء يا أخي)
خناقات وبطجية وطرق بتتقطع ومظاهرات وإعتصمات ومطالب فئوية وزبالة وشوارع مبهدلة وأزمة مرور وطوابير عيش و...و...و..و
الغريب والمدهش في الموضوع ده كله إن الناس بتيجي في الأخر وتلوم على .....الشعب!!!!!!
على اساس ان الشعب هو من بيده مقاليد الأمور
يعني ملاحظ إن الناس مرحبه قوي بتفعيل قانون الطوارئ عشان إحنا (شعب) ميجيش غير بالعين الحمرا
وزعلانيين قوي من الحالة اللي وصل ليها المرور في مصر عشان إحنا (شعب) فوضوي
ومضايقين قوي من البلطجية وقطاع الطرق عشان إحنا (شعب) همجي!!!!
طب بالنسبة للحكومة إيه موقفك منها؟؟؟؟
تخيلوا كده لما نعمل إنتخابات مجلس شعب وشورى ونختار رئيس جديد
إيه اللي هيختلف في الشعب؟؟!!!
و ساعتها بقى يطلع رئيس الجمهورية يطالب بتغيير الشعب
والدستور ينص في المادة 76 على أن يتم إنتخاب الشعب المصري لمدة أربع سنوات وتجدد لفترة واحده لو طلع شعب كويس!!!
طيب لو الرئيس الجديد إكتشف إنه مش قادر يسيطر ورجع يستخدم القمع تاني (اللي هنرحب بيه ساعتها طبعاً زي قانون الطوارئ دلوقتي) هيحصل إيه؟؟!!
طب ما إحنا شفنا القمع أدى لإيه في الأخر في عهد مبارك
ماهي النتيجة هتبقى واحده برضه هتقوم بعد فترة ثورة تانيه
ونفضل في نفس الدايرة المفرغة!!
طيب إحنا ليه رافضين نحاسب مؤسساستنا والقائمين على الأمور
ولا إحنا بندور على شماعه غير معرفة نرمي عليها مشاكلنا هروباً من المواجهه وخلاص
أصل هي دي طبيعة(الشعب) المصري!!
كلمة مطاطية واسعه قوي مالهاش أول من أخر في وسط 85 مليون مصري بإختلاف ثقافتهم وأشكالهم وألوانهم
ماهو أنا الشعب وأنت الشعب وأحمد زويل الشعب والبلطجي من الشعب وحسني مبارك ماهو شعب هو كمان
هتحاسبهم إزاي
لكن الحساب مبيكونش كده
الحساب بيكون لشخص مسئول عن أداء واجب معين ولم يؤده
الحساب بيكون لمؤسسة فشلت في تنفيذ المطلوب منها
لجهة مسئولة لم تتحمل قدر مسئوليتها
عندما يحدث إنفلات أمني لا تبحث عن الشعب بل حاسب الشرطة
وعندما تشكو من تدني الثقافة فحاسب وزارة التعليم والإعلام والثقافة
ولما ماتلاقيش إنتاج والموظفين يعملوا إضلرابات حاسب رؤسائهم اللي ضربوا بطلباتهم عرض الحائط ومنفذوش منها حاجو وهروهم وعود مبتنفذش
وعلى طريقة الكابتن حلمي بكر هييجي واحد يقوللي طب وهي الحكومة هتلاحق على إيه ولا إيه والشرطة تشتغل إزاي والناس بتهاجمها
أرد عليه وأقول له أنا أسف الحلول موجوده وبدل الحل ألف
الشرطة لن تُحترم إلا إذا أدت دورها في حماية المواطن أولاً وإحترمته ثانياً ساعتها نتكلم عن إحترام الشرطة
لما الباشا يعرف إنه بيبقى باشا لما بيحميني مش لما بيلبس البدله
ولو محصلش ده عمر ما حد هيحترم الشرطة لأنهم هيبقوا بالنسبة لينا في الأخر عبارة عن مجموعة من الموظفين الكسالى اللي مبيأدوش عملهم
المواطن المصري بقت بتظهر في عينه نظرة فرح لما بيشوف ضابط واحد بيقوم بعمله وبيبقى ناقص يشيله على الأعناق
بقت موقف غريب دلوقتي أننا نشوف ضابط بيؤدي واجبه
أحداث السفارة و الألتراس وخلافة الشعب برئ منها براءة الذئب من دم إبن يعقوب
مرتكبيها مخطئين ولكن ليس الشعب
من سمح بحدوث مثل هذه الأشياء هو المخطئ
اللي سحب قواته وترك السفارة بدون تأمين هو المخطئ
من لا يؤمننا في بيوتنا وشوارعنا وحياتنا هو المخطئ
إحنا معندناش مشكلة نؤمن نفسنا بنفسنا
بس سييبوا مناصبكم وإدونا الفلوس اللي بتقطعوها من أكلنا وشربنا وصحتنا بدعوى "موازنة الأمن"
هننزل نشيل الزبالة بس رؤساء الأحياء والمحافظين يستقيلوا ويدونا الفلوس اللي بياخدوها واحنا نعرف ننضف بلدنا كويس ولحاسبنا الشعب وقتها
المصريين حموا بلدهم وأمنوها 18 يوم من غير ضابط شرطة واحد
بس علشان نعمل كده سيبنا أشغالنا وحياتنا
كل واحد لازم يقوم بدوره في المجتمع ده
واللي مش هيقوم بيه ميطالبش الناس بإحترامه ولا تقديره ولا يطالبنا بأموال ننفقها عليهم فتذهب هباءً
وإذا كان المسئولين في هذا الوطن مش عارفين يحموا الناس ولا ينضفوا الشوارع ولا يوفروا لهم أبسط سبل الحياة الكريمة
فأنا بنصحهم يقدموا إستقالاتهم جميعاً أو لا يلوموا إلا أنفسهم لأن (الشعب) لن يرضى أن يهان مرة أخرى
