خليك كدة
مفعول به
منصوب عليه
مشدود لأكل العيش
وبتدور عليه
ولا بتلاقيه
ولا بتلاقيه
مجرور بدون خيارات
وجوعه ومعدته
كاسرين عينيه
خليك كده
مضاف اليه
و مالوش لزوم
لو شلته م الجملة
برضه الكلام مفهوم
بيوضح القصة
وبيوصف المهزوم
خليك كده
جمعك مذكر
بس مش سالم
والتاء في تأنيثك
قابلها ومسالم
كلمه كده
مالهاش معالم
لا بينصف الحق صوتها
ولا تنقد الظالم
خليك كده
معطوف عليه
الأصل هو
وانت تتبع ليه
وان كان حرامي ولا بيه
قصة حياتك
تكمله لمعانيه
خليك كده
من غير ضمير
رافض تكون نفسك
مستعصي عالتغيير
نايم ومن غير حلم
وان يوم لمست الظلم
تكوي الألم بالنفي
وتقول عليه ده مصير
خليك كدة
في الفعل
مش مرفوعة راسك
والاسم
مش بيجيب خلاصك
خايف لتجزم في القرار
فتروح خبر كان
بحماسك
بحماسك
خليك كده
تنجر رجلك
للطريق الصح
ما تمشيش
وتقول فيه (إن)
رغم انه مافيش
اسمك
ما يصنعش الخبر
وصوت ضميرك
مستتر
في شبه جملة ماتساويش
خليك كده
انا لسه برضه حاساها جاية ع الجرح و مش قادرة اعلق عليها اكتر من كده عشان بتوجعني !!
ردحذف