مقدمة
تجربتي في هذا الأمر تكتسب أهميتها من وسطيتها
بمعنى انني لست منتمي لأي حزب سياسي ولا ديني
ولا حتى نادي رياضي
وكمان انا مش مهمش ولا عواطلي ولا صايع
ولا انا غني ولا انا فقير
اتعلمت في مدارس الحكومة لكن برضه واخدلي كام كورس على كام دبلومة كده من الجامعة الأمريكية و غيرها من الحاجات اللي هيه اختصارها بيتكون من 3 حروف بالانجليزي
انا باكل في كنتاكي و ماكدونالدز و موري سوشي وتشيليز...
وفول و طعمية و كبده من على العربية
عربيتي مش 3000سي سي ولا هي مش موجوده اصلاً
هي 1600 و بالتقسيط و قسطها بيقطم وسطي
باختصار مطالبي في الحياه مينفعش تكون مادية أو إجتماعية قوي لأن ممكن نقول كده انها
"مستورة والحمد لله"
انا لست من طبقة المثقفين اللي بحضروا كل حفلات باليه كسارة البندق في الأوبرا وبصراحه معلوماتي عن تشايكوفسكي و شكسبير ضعيفة
لكن برضه عندي فكرة كويسة عن احمد زويل و اخترع ايه عشان ياخد جايزة نوبل و ايه هو الدخل القومي و الموازنة العامه للدولة وعارف ايه الفرق بين الدستور و القانون
وقرأت كتاب عصر العلم لأحمد زويل و طبعاً عارف الفرق بين الإيميل و الويب سيت
من الأخر أنا شخص يصعب تصنيفه الا بإحدى الكلمات الأتية (وسطي - طبقة متوسطة - محايد....إلخ))
و اعتقد اني بكده أبقى بعبر عن طبقة كبيرة قوي من المجتمع بتاعنا ده
نبتدي منين الحكاية:
أعتقد ان الحكاية ممكن تبدأ من كل يوم الساعة 9 و نص الصبح
وده الوقت اللي بكون وصلت فيه لشغلي وبدأت في تصفح الأخبار (على الأنترنت طبعاً بما اني قلت اني عارف الفرق بين الإيميل و الويب سيت)
وطبعا بينزل عليا سيل من الأخبار المستفزة من عينة:
عائشة عبد الهادي تقول "يوجد لدينا 30000 فرصة عمل بمتوسط أجر 5000 جنيه"
أحمد عز "لاتوجد ممارسات إحتكارية للحديد في مصر واللي عاوز يستورد يستورد"
الرئيس أوباما يشيد بمواقف الرئيس مبارك الشجاعة تجاه عملية السلام ويحلف يمين طلاق ثلاثة انه ما هيتحرك خطوة واحدة الا بعد ما ياخد راي الرئيس مبارك
احمد نظيف يتحدث عن أنجازات الحكومة في 10 أعوام
و هذه العينة من الأخبار التي لا تؤدي الى أي شئ غير الى ارتفاع ضغط الدم و العكننه على الصبح
ده غير الأخبار التانية اللي بتعكنن بطبعها زي
واحد مصري اتعلق في لبنان و مثلوا بجثته
و شاب يقتل ابوه داخل مسجد عشان 40 جنيه و طبعا الحالة الوظيفية للشاب ده معروفه.......عاطل
اجي انزل اروح من شغلى الاقي زحمة فظيعة غير مفهومة ..... في ايه يا جدعان؟ أصل وزير الداخلية معدي ولا اصل احمد نظيف نازل من القرية الذكية
ده غير الشرطة المستفزة طول الوقت
و البلد اللي شايفها بعنيى عماله أحوالها تسؤ من أسوأ الى أسوأ
حالة من الإحباط العام و المستمر في كل شئ يرتبط بكلمة مصر
المهم انا كنت من زمان داخل على جروب كلنا خالد سعيد
و لقيت في دعوة من الجروب ده لوقفه صامته إعتراضا على التعذيب في مصر
"الله وقفه صامته؟؟؟محدش ليه عندي حاجه.....هلبس اسود و أنزل أقف ساكت"
وارجع ارد على نفسي و أقول
"يا عم وانت هتعمل ايه و لازمتها ايه الوقفه دي....مش هتغير حاجه"
المهم مقدرتش قلت هنزل حتى عشان ضميري يرتاح و أحس اني عملت أضعف الإيمان
و دي كانت أول موقف سياسي أتخذه في حياتي في مصر
و بيني و بينكم حسيت اني أحسن من اي حد معملش زي
حسيت أني إيجابي وراضي عن نفسي
حسيت اني بحب بلدي
مش معترض في سري و خلاص
يوميات المتظاهر الصغير الجزء الثاني
يوميات المتظاهر الصغير الجزء الثاني
ليست هناك تعليقات:
إرسال تعليق