من أشعاري في وصف حال مصر قبل الثورة كتبت في 15 أكتوبر 2010
هي اتغيرت ليه عن زمان
هي اتغيرت ليه عن زمان
احوالها ليه اتبدلت
و ايه اللي شقلب فيها الكيان
عرفت فلان...؟
سابها فلان...؟
البت كبرت قبل الأوان
وطمعوا فيها
و ساقوا الجنان
و ساقوا الجنان
بقى ده بيغمز و ده بيهمس
وده بيتجمل في حسن القوام
و البت لسه صغيرة
اليوم في شبابها بألف عام
مالها و جمالها
قوٌم عليها الف جبان
و البت حلوه و متزوقه
تجري فيها سلاسل دهب
من البحر حتى جنوب أسوان
وحداها طين و حداها أرض
و خير كتير بالطول و بالعرض
طمعوا الديابه وماهمهش العِرض
و طلعوا سلب و نزلوا نهب
وباعوا فيها و تاجروا بيها
ورمولنا فتنه لهونا فيها
ده يقول ده سنه
ودي تقول ده فرض
وبقت مشاع لكل الجوار
و البت تكبر و يضيع الجمال
ويروح شبابها ويجي شيبها
وما حد عارف لفين مصيرها
ولما تعبت وزاد مرضها
طلبت علاج واكل ودوا
قالوا مفيش
مفيش
قالوا مفيش
مفيش
انتي اصلا معندكيش
ردت وقالت و منين أعيش؟
ضحكوا وقالوا حظك كده
وعشان تكوني متأكده
أدي الخزاين مافيهاش رغيف
ردت وقالت يا لطيف
هو الخسيس دايماً كده هيفضل خسيس
واقفين يعايروها
وخيرها بيتقسم من ورا الكواليس
وخيرها بيتقسم من ورا الكواليس
واللي يقرب أو يفكر يداويها
هيروح فطيس
ويقولوا جوع ويقولوا فقر
وهما السبب من بادئ الأمر
مصر بلد مبتشتكيش من الفقر
مصر بلدنا
مكتوب عليها الجوع بالأمر
مكتوب عليها الجوع بالأمر
My all time favorite :)
ردحذف