بساطه احنا لما بنتناقش في السياسة:
1- بيبتدي كل واحد طرح وجهة نظرة بطريقة فيها استخفاف بوجهة النظر الأخرى
2- محدش بيراعي خلفية الشخص اللي بيتكلم معاه ايه ....يعني طالب الجامعة مثلاً غير واحد ناشط في 6 إبريل غير واحد من الإخوان المسلمين غير المواطن العادي غير الشاب الأعزب غير الراجل اللي بيصرف على عيلة غير واحده ابنها استشهد في المظاهرات
3- كل كلامنا بيفتقر للقياسات الواضحة....زي لما نيجي نقول فلان كويس....طب هو يعني ايه كويس؟؟أوفلان ليه انجازات....ايه هي الإنجازات و ليه شايفينها انجازات...أو فلان حرامي..طب سرق ايه؟؟
4- تستمر حالة الإستفزاز و الإستخفاف مع استخدام الكلام المطاطي اللي مالوش رد لأنه لا يمكن قياسة(هتقولي فلان كويس هقولك لأ وحش ) فمش بنوصل لحاجة في الأخر و ينتهي الأمر باننا نشتم بعض و نقول على بعض خونة و عملاء و أغبياء و الكلام اياه ده
5- احنا كلنا مش بنقرأ كتير من زمان و بالذات في السياسة فلازم نعترف ان عندنا شئ من الجهل السياسي وان أغلب كلامنا بنرده من اللي بنسمعه واللي بنسمعة ده كلام مش موثوق فيه عشان كده انا بقول اللي ذاكر سياسة من زمان بيقدر يتكلم دلوقتي لكن اللي بدأ يذاكر دلوقتي فالمذاكرة صعبة قوي من كثرة تتابع الأحداث و تلاحقها و كثرة الأراء الظاهرة حالياً على الساحة و التي تحتاج الى وقت و خبرة طويلين لدراستها
ليست هناك تعليقات:
إرسال تعليق