انا مش هأتكلم عن قد ايه الإسلام فيه سماحة و بيأمر بحسن المعاملة مع إخوانا المسيحيين
و مش هأقول بقالنا قد ايه عايشين مع بعض مسلمين و مسيحيين بسلام
ولا قد ايه المسيحية دين بيدعوا للسلام و حسن التعامل حتى مع الأعداء
مش محتاج أقول الكلام ده هنا
لكني محتاج أوصل رسالة و أسأل شوية أسئلة محتاجين نجاوب عنها جوانا
الى كل السادة و السيدات الذين هبت أقلامهم تشجب و تدين الأحداث الأخيرة في أطفيح و منشأة ناصر و الموسكي و المقطم شكراً لكم ......لكن للأسف اللي عملوا كده مبيعرفوش يقروا
الى كل شاب و فتاة قام بتغيير صورة البروفايل بتاعته للهلال و الصليب و كتب تحتها مسلم و مسيحي ايد واحدة......للأسف الناس اللي ضربوا و قتلوا بعض معندهمش اكونت على فيس بوك أو تويتر
إخواننا الإعلاميين اللي طلعوا يصرخوا في وجه هذه الأحداث في التلفزيون شكراً قوي....بس برامجكم بالنسبة للناس دي عبارة عن فيلم قصة مافيهوش مناظر فمش هيشوفوه أصلاً
وأخيراً أحب أبشر كل واحد بحاول يحارب الطائفية في مصر ويعمل على درأ الفتنة الطائفية.......مش قصدي أحبطك لكن مصر مافيهاش فتنة طائفية وانت بتحارب الوهم
قبل ما حد يتنرفز عليا و يقولي مفيش فتنه يعني ايه امال الناس اللي بتموت دول ايه و الأحداث و إلخ إلخ
عاوز كل واحد فيكوا يمسك ورقة وقلم و يكتب أسماء أصدقائه اللي من ديانة مختلفة اللي مستعدين يقتلوه!!! أو أصلاً مستعدين يقتلوا في المطلق
انا عارف ان في بعض الناس هتقولي لأ معلش احنا نعرف فلان بيضايقنا عشان احنا مسيحيين
او علان بيرخم عليا عشان أنا مسلم
سؤالي واضح....الشخص ده عنده استعداد يموتك أو يضربك لمجرد انك مسلم أو مسيحي؟
طيب سؤال تاني معلش
هو ايه الي حصل في التحرير ده؟
منين المسلمين كانوا بيصلوا و حواليهم مسيحيين و بعدين المسيحيين بيصلوا و حواليهم مسلمين و بعدين بعديها بكام يوم الناس تمسك في بعض و يقولولنا المسلمين بيتخانقوا مع المسيحيين أو العكس
طب مين دول و مين دول
يا جماعة الأجانب تعبوا معانا بجد
منين امبارح بيقولوا لولادهم إعملوا زي المصريين و النهارده المصريين بيموتوا في بعض؟؟!!!
هو الفيس بوك عليه كام أكونت لمصريين؟
كام واحد فيهم كان مؤيد لحادثة كنيسة القديسين؟؟
طيب كام واحد منهم فرح لما كنيسة أطفيح اتهدت؟؟!!
لحظة واحدة كده!!!
هي الكنيسة اتهدت فين قولتولي؟؟
في أطفيح
أطفيح مركز الصف
اطفيح مركز الصف الجيزة
هما الناس اللي عايشين في القرى دي عيشتهم عاملة ازاي؟؟؟
هما أخبار التعليم عندهم ايه
قولولي هما عندهم تويتر أو فيس بوك عشان لو حبينا نكلمهم
الا هو كام واحد في القرية دي تعليم عالي و كام واحد تعليم متوسط؟
هو أخبار التعليم المتوسط عندنا ايه؟
بيطلع شباب حلوين كده و متعلمين بيعرفوا يقرأوا و يكتبوا؟؟
وأخبار الشيخ اللي بيقول خطبة الجمعة هناك ايه؟
يا ترى الراجل ده مؤهل انه يخطب في الناس ؟
في حد بيعدي يتأكد ان الأحاديث اللي بيقولها الراجل ده صحيحة؟
طيب و القس اللي في الكنيسة هناك؟
هو أنا لو إختلفت مع شاب من شباب أطفيح في الرأي عشان كان داخل بالتوكتوك بتاعه عكس في الشارع و انا جاي بعربيتي رد فعله هيبقى عامل ازاي؟
إلا قولولي صحيح
أخر مرة حد فيكوا اتخانق مع واحد زمالكاوي و قال له أصل الزمالكاوية كلهم أغبيا كان امتى؟
طب كام واحد قاعد معانا هنا شايف ان الدمايطه بخلاء؟و البحراوية إتمين؟ و الصعايدة أغبياء؟و الفلاحين لؤمه؟
اخر إشاعة صدقتها كانت امتى؟؟
وأخر خبر نقلته و كان مصدره "بيقولك" كان ايه و امتى؟
كام خبر من دول طلع صح؟
و كام خبر منهم اتنقل زي ما اتقال بالضط؟
كام واحد فينا يا جماعة قاعد معانا دلوقتي و ليه أصحاب مسلمين بيحبهم و ياما وقفوا جنبه؟
و كام واحد فينا قاعد دلوقتي ولو حصلت له مشكلة أول واحد هيتصل بيه هو صاحبه المسيحي؟؟
مصر مافيهاش قتنة طائفية يا حضرات
مصر فيها جهل
قلة ثقافة
تعميم أفكار
حكم مسبق على الأمور
مصر فيها ظلم و فقر
مصر فيها عشوائيات وللأسف دول معندهومش تويتر و فيس بوك
و مش بيتفرجوا على التوك شو في التليفزيون
و صدقوني قليلين منهم اللي بيصلوا الجمعة أو الأحد
ودول نتيجة 30 سنة من القمع و كبت الحريات و تدمير التعليم
فلا تحاربوا الفتنه فهي وهم صنعوه داخل عقولنا و حاربوا الجهل و الفقر و قلة الثقافة
ليست هناك تعليقات:
إرسال تعليق