"في يوم بفتح باب الشقة الاقي جاري معلق ورقة مكتوب عليها "بطلوا رمي زبالة يا عالم يا زبالة"
بصيت قدام شقتي مالقيش فيه زبالة ولا حاجة
قلت أكيد حد جه رمى زبالة وانا مش موجود ولا حاجة
قلت أكيد حد جه رمى زبالة وانا مش موجود ولا حاجة
تاني يوم بافتح باب الشقة ألاقيه معلق ورقه "شيلوا الزبالة يا ولاد الكلب"
تالت يوم "ناس معندهاش دم"
الموضوع استفزني قوي بقى بصراحة
قمت مخبط عليه
لاقيته بيستقبلني بإبتسامة عريضه
"أبو حميد إيه أخبارك"
قلت له "ايه الورقه اللي حاططهالي دي كل يوم يا عم انت مين قاللك اني برمي زبالة هنا ولا فين هي الزبالة اصلاً"
قاللي "ايه يا عم انت إهدى شوية مين قاللك اني أقصدك انت؟"
قلت له "أمال تقصد مين هو في غيري و غيرك في الدور ؟؟"
قاللي "لا يا عم ده انا قصدي على الجماعة "دول" اللي بترمي زبالة تحت في الشارع قدام العمارة"
قلت له " والدور بتاعنا ده في حد بيرمي؟"
قال لي "لأ"
قلت له "طب معلق الورقه هنا ليه؟"
قاللي "ماهو هنا محدش بيقطعها"؟؟؟؟؟؟؟؟؟!!!!!!!!!!!
القصة اللي فوق دي لم تحدث بالفعل
لكن تقدر تقول انها بتستمد أحداثها من الواقع على رأي بتوع السينما
من ساعة ما ربنا فتحها علينا و الناس بدأت يبقى ليها إتجاهات سياسية يمكن الإعلان عنها من بعد الثورة
أو من قبل كده بشوية لما بدأت تحصل مناوشات طائفية و انا ملاحظ ان في حاجة مستفزة جداً بتحصل على الفيس بوك
اصحى الصبح ولسه بقول يارحمن يا رحيم
اصحى الصبح ولسه بقول يارحمن يا رحيم
اجي افتح الفيس بوك ألاقي واحد صاحبي عامل شير لفيديو والفديو مكتوب عليه مثلاً (فتوى اسلامية بقتل البرادعي)
والاقي صاحبي ده كاتب تعليق على الفيديو (هتعملوا فينا ايه تاني؟)
وجود كلمة "إسلامية على الفيديو - وبصفتي مسلم - بتستفزني وبتضطرني أني أرد على صاحبي و أحاول أوضح إن الإسلام مبيقولش كده من منطلق اني مسلم مش إن على راسي بطحه
فيدور بيننا الحوار الأتي:
- "ابو حميد ازيك (صديقي مبتسماً) "
- أبو حميد ايه و نيلة ايه بس يابني ايه اللي انت حاطه ده؟
- اه شفت ....ده فيديو طلعته من على اليو تيوب أنا مش عارف الجماعه "دول" عاوزين مننا إيه؟
- "دول" مين؟
- الإسلاميين؟
- إسلاميين إيه يخرب بيتك ما انا إسلاميين
- لأ يا أخي قصدي التيارات الإسلامية المتشدده
- ايه ده هو في حد من صحابنا إنضم لتيار متشدد؟
- لأ
- أمال انت حاطط الفيديو ده لمين ؟
- عشان يشوفوه ويعرفوا أننا مش هنسكت
- مين اللي يشوفوه
- الجماعه "دول"
- يادي النيله هو في حد عندك منهم
- لأ بس ماهم موجودين عالفيس
- طب ما تبعتلهم مطرح ماهم موجودين عالفيس ....بتحرق دمي أنا عالصبح ليه؟
ومن ناحية أخرى تلاقي واحد من صحابنا تاني واخداه الجلالة قوي و حاطط مقالة ولا حاجة عن تعديل الدستور وكاتب لك عليها من فوق
"بأبي أنت و أمي يا رسول الله على جثثنا لو تم المساس بالمادة التانية من الدستور مصر إسلامية"
أصحى الصبح و لسه بقول يارحمن يا رحيم ألاقي الكلام ده في وشي
"يا ساتر يارب......جثث عالصبح كده؟؟؟؟"
"الواد ده كاتب كده ليه؟"
"لايكون فاكرني عاوز ألغي المادة دي من الدستور "
أخش أتكلم معاه
- أبو حميد إزيك (صديقي مبتسماً :)
- إزيك ايه و نيلة ايه بس إيه يابني اللي انت حاطه ده؟
- اه شفت دي مقالة واحد كاتبها .....قال ايه عاوز يلغي المادة التانية من الدستور أنا مش عارف الجماعه "دول" مالهم و مال الإسلام؟؟
- "دول" مين؟
- الناس اللي بتكره الإسلام و بتثير الفتن
- انت قصدك حد معين نعرفه؟ الواد جورج عمل معاك حاجه؟ قوللي وانا أظبوطهولك؟
لأ داحنا رايحين نضرب فول و طعمية من عند الجحش النهارده بالليل ... إيه النظام ما تيجي معانا!!!!!!!!!
صديقي القارئ
لو سمحت
ممكن تفتح أصدقائك كده اللي على الفيس
أيوه
مكن تبص فيهم كده
- مين ده؟
- ده احمد صاحبي في النادي
- طب و مين ده
- ايه يابني ده سمير الواد الدحيح بتاع الكلية
- طب و دي
- دي أسماء البنت اللي كنت بحاول أظبطها و فشلت
ودول العيال بتوع الكورة ,ودول جيراني,ودول قرايبي ,ودول........................ - حلو قوي .....في حد من دول بقى إسلامي متشدد أو بيعادي الإسلام أو عاوز يولع في مصر أو حاجة
- لأ طبعا و دول ايه اللي هايجيبهم عندي دول؟
- طيب يبقى حضرتك بتعمل شير و بتوجه الرسائل اللي بتكتبها دي لمين؟؟؟
- أنا بوجهها للجماعه "دول" اللي عاوزين يولعوا في البلد
- طيب أنا هقولك تعمل ايه
شوف يا حبيبي أنت تروح على الفيس و تعمل سيرش على الجماعة "دول" و اللي يطلعلك تضيفه عندك و توجهله الكلام الل انت عاوزه
لكن إحنا مالناش ذنب كل يوم نصحى على شتيمة و حرب لاناقة لنا فيها ولا جمل
أنا مسلم الحمد لله أشهد أن لا إله إلا الله و أن محد رسول الله و أقيم الصلاة و أؤتي الزكاة وأصوم رمضان وهحج بيت الله لما أستطيع إليه سبيلاً و محدش يقدر يقول عليا ولا على الإسلام نص كلمة
و في نفس الوقت أنا معرفش حد بيعادي الإسلام أو شايف ان المادة التانية لازم تتشال ....غاية ما في الأمر ان في ناس بتطالب بمواد تحفظ لها حقوقها في الدستور وده حقهم
مدام انت مش بتحب المتشددين يبقى أكيد مفيش حد منهم على البروفايل عندك فبلاش تكتبلي أنا الكلام ده ولو في حد عندك يبقى إبعتله هو بس ...متعملش شير لكل الناس ولا انت بتجيب الفيديو و تحطه لصحابك عشان تعمله عليه حفل بالليل؟؟
أما بقى لو حضرتك مسلم بجد و بتخاف على دينك وهويتك فأنا فخور بيك قوي بس حظك وحش ....انا مسلم زيي زيك فمش فاهم قوي سيادتك باعتلي أنا الكلام ده ليه؟
إيه شعورك لو وانت ماشي في ميدان الجيزة لقيت واحد واقف على كرسي و بيزعق في الناس عشان مترميش زبالة في على شاطئ الإسكندرية؟؟؟؟ ولا اللي في الجيزة فاهمين ولا اللي في إسكندرية سامعين!!!!
ليست هناك تعليقات:
إرسال تعليق