جرح الوطن......أشعار ما قبل الثورة ......بس خللوا بالكم من أخر حته :D


دبت في جسمي الروح
حسيت بجرحي
و أتاري كل اللي عيشته فيكي
ماكنش فرحي
اه ياني يا بلد واجعالي قلبي
من الف جرح و جرح
جرحك لوحده بيدمي
جرحك صايبني
جرحك هاددني
سكت كتير عقلي و هاودني
كبر في قلبي الخوف
عشش جواه و سادني
نساني جرحي
خدر جوارحي
خلاني أشوف ظلمك عداله
وأسمع كلام الناس..أقول إستحاله
وألمس بإيدي الفقر ..أقول دول عواله
حتى اللسان ..منع الكلام
و قبلت على نفسي الإهانه
أه يا بلد قلبت حرامه على حلاله
واللي سرق و اللي نهب
عيشته على أرضك بتحلاله
نزعوا عن أرضك لقب الكنانة
ولا فيكي امن
ولا حتى عاد فيكي أمانه
مسحوا في تاريخك كلمة حضاره
قتلوا في أبنك كلمة كرامه
زرعوا في شعبك وصف السذاجه
و علموه إن الخروج منك شطاره

فكي جوارحي يا بلادي من تاني
برغم جرحك لسه حبك مالي كياني
لسه غلاوتك باينه في كلامي
مايغركيش عوجة لساني
ده أنا بس باتخفى
ليعرفوني و يسألوني
أنا كنت ليه بأرضى بهواني؟
بقلم محمد أويس at الأحد, مارس 20, 2011
Labels:

هناك تعليق واحد:

الاشتراك في: تعليقات الرسالة (Atom)